He Kete Whakawaitara : He Whakatara a-Rangahau

Ko te kete whakawaitara, he kete whakairo. He kete i waihangahia mai i te Whareporahau o Hineteiwaiwa. Ko nga tuhinga korero kai roto i teneki pukapuka i whaowhia mai ki te kete whakawaitara a Hineteiwaiwa hai whatui i nga rauhi whakatara a-rangahau. Ko te kaupapa ia o teneki pukapuka he whakatakoto huarahi hai awhina i te hunga tuhituhi i a ratau Tohu Paerua, Tohu Kairangi hoki ki roto i te reo rangatira.

E kitea ai te ara wheiroiro o ia upoko mai te whekerekere o te po, ki te whekite o te ao. Ki te ata tirohia nga whakatakotoranga korero a-tuhi o weneki kaitiriwa i te kupu ka whekori te hinengaro me te wairua o te kaipanui i takohahia mai i nga putuputu puaho whitireia o te kurahuna. Koia teneki ka rarangahia ake nga puihoiho o te matauranga Maori me te matauranga a-iwi. No reira tena koutou nga toki tarai kupu hai whare pupuri, whare hekeheke, whare tukutuku mo nga pia o Te Wananga.

Ko te hua nui o tenei pukapuka he kohikohinga korero, he rauemi whakanikoniko, he huarahi ako i nga pia o nga Whare Wananga puta noa i te motu ki ta te Maori rangahau korero, kia Toi whakaoho i a tatau ki nga whare whakaheke korero a tatau ake. Kia whakaaratia mai e nga kaituhi reo a tatau pukenga rangahau tuhituhi ki roto i to tatau reo rangatira. He whakaora mai i nga kokona korero, nga tatai korero, ki nga korero tuku iho e hangai pu ana ki nga hapori reo a-whanau, a-hapu, a-iwi mo te kura tangata.

E takoto ai i a tatau nga kaituhi reo he oranga, tuhonotanga whakaara i te matauranga o te whanau, hapu me te iwi hai toroa titiro tawhiti, hai toroa titiro tata. E kitea ai te hononga tangaengae o nga korero tuku iho, ki te whakatara a-rangahau e whiri kau ana ki nga rau piki me nga rau heke o te kete whakawaitara. E apiti hono tatai hono ai nga whakatakotoranga kaupapa rangahau ki ia whakatipuranga hukahuka, ka apiti hono tatai hono ki ia whakatipuranga tangata.

The kete whakawaitara is a finely woven patterned basket, and the chapters in this book are gathered in such an artful kete of challenging research. This book will provide models for those who are working on writing undergraduate or postgraduate degrees in te reo Māori.